終於感覺到冬天的氣息，相信大家已經開始「馬拉松式」打邊爐、BBQ，但經常進食燥熱食物，小心惹「火」上身！立即介紹五款瀉火湯水俾大家清熱滋潤一下！
一) 龍脷葉蘋果甘筍瘦肉湯
連打兩日邊爐搞到喉痛聲沙？新鮮龍脷葉性質平和、清熱潤肺、潤腸通便，配蘋果、甘筍、杏仁等煲湯，對肺燥咳嗽，乾咳，便秘很有幫助。
二) 蓮藕雪梨排骨湯
鮮蓮藕益胃健脾，雪梨生津解燥，一同煲湯，有補脾益血的功效。湯料中加入馬蹄、紅棗可平衡屬性偏涼的蓮藕，再配一些瘦肉或西施骨同煮，令湯更為鮮美。
三) 粉葛赤小豆茯苓排骨湯
粉葛能去骨火引致的肩頸肌肉緊張，再配赤小豆、茯苓、陳皮煲湯服，對高血壓、高血脂、心血管等疾病患者都非常有益。
四) 滋陰潤燥—沙參海玉竹鮮響螺湯
BBQ 後第二朝瞓醒覺得口乾及有點燥熱的感覺，就要嗱嗱聲整幾個急凍鮮響螺，配沙參，海玉竹等煲雞湯，鮮美又滋潤，不寒不燥，老少可飲。
五) 西洋菜陳腎羅漢果蜜棗瘦肉湯
冬天西洋菜特別好食，除了用來打邊爐外，用來煲湯更可清熱潤燥，健脾清滯，加上羅漢果味甘甜，有清熱止咳潤喉之功用。特別適合有煙酒習慣、或常常吃煎炸食物的人士飲用！
唔想下下又菜又肉去煲湯？就要留意下一篇潤肺消脂飲品介紹，素食者都啱飲！
